AnnaBelle , Isabelle , Konrad Pulè , Daniela Delicata . Dawn huma wħud mill- ismijiet minn fost il- lista ta' 14-il kantant finalist li fi Frar li ġej se jikkompetu biex jaslu sa l- aħħar serata tal- Kanzunetta għall- Ewropa f' Dar il- Mediterran għall- Konferenzi fil- Belt . L- ismijiet huma biss ftit mil- lista ta' finalisti - kif magħżula ġimgħa ilu - li hi dominata minn " ismijiet sorpriża jew li huma pjuttost ġodda fix- xena mużikali " . L- uniċi ismijiet ta' kantanti stabbiliti li rnexxielhom jidħlu bħala finalisti huma Olivia Lewis u William Mangion . X' ġara ? Għaliex dan it- taqlib kollu ? Ir- risposta tinsab fil- metodu ġdid li beda jintuża biex jintgħażlu l- kantanti , u fuq kollox dik il- kanzunetta li tista' taqla' lil Malta mill- fażi ta' kwalifikazzjoni għall- Eurovision ta' Helsinki f' Mejju li ġej . Ir- riżultat diżastruż miksub minn Malta aktar kmieni din is- sena f' Ateni bil- kanzunetta " I Do " ta' Fabrizio Faniello tikseb l- aħħar post fil- klassifika tal- voti finali , iġġiegħel lil Malta li tipparteċipa fi prekompetizzjoni li matulha issa teħtieġ li tintgħażel minn fost 10 li jridu jidħlu għall- finali ta' l- Eurovision f' Helsinki . B' hekk r- riżultat diżappuntanti miksub minn Malta wassal għal reviżjoni sħiħa fil- metodu ta' l- għażla tal- kanzunetta li se tirrappreżenta lil Malta . " Irridu nifhmu li l- kanzunetta ta' Malta għall- Eurovision mhix se tibqa' Malta . Se tkun esportata u għalhekk teħtieġ tirrispondi għall- ħtiġiet tal- gosti u s- suq internazzjonali , " sostna ċ- Chairman tal- Maltasong Robert Abela f' intervista ma' Illum li matulha spjega l- mekkaniżmu li tħaddem biex intgħażlu l- kanżunetti finalisti għall- festival li ġej . " Din kienet l- ewwel darba li morna għal ġurija totalment barranija magħmula minn esperti fil- qasam mużikali , " spjega Robert Abela li żied fuq kif il- ġurija ma ħarset lejn wiċċ u isem ħadd . " Il- MaltaSong hi determinata li twassal sa Helsinki dik il- kanzunetta li tista' tinbiegħ barra u li ma tkunx popolari biss għall- widna Maltija , " insista . Viżibbilment konvint mill- istrateġija l- ġdida li nsista fuqha kemm ilu fil- kariga bħala Chairman tal- MaltaSong , Robert Abela qed jappella lill- pubbliku Malti biex jifhem l- importanza li tintgħażel kanzunetta li tkun " esportabbli " . B' kollox kien hemm 228- il kanzunetta li kienu sottomessi għall- konsiderazzjoni . Madankollu fit- tieni fażi ntgħażlu 35 li minnhom intgħażlu 14-il finalista għas- semifinali f' Dar il- Mediterran għall- Konferenzi . " Neħħejna l- ġurija ta' Maltin apposta . U bl- akbar responsabbiltà ninsisti li għamilna sew għax hekk neħħejna l- piż li wieħed jiffavorixxi aktar lill- kantant milli l- kanzunetta " . Għal Robbie Abela " ma jfisser xejn jekk int stabbilit jew le . L- importanti li l- kanzunetta tkun tajba għall- barra u mhux staġnata għas- suq lokali biss . " B' hekk , fi ftit kliem , hu dan il- fattur prinċipali li " heżżeż " l- affarijiet għall- festival li ġej . Robert Abela hu ċar fi kliemu : " Nappella lill- awturi u lill- kompożituri biex jimirħu u ma jistaġnawx . Neħtieġu ħoss ġdid u mhux aktar dak li nassumu li hu tradizzjonali għall- Eurovision . " Il- ġurija barranija ma jimpurtahiex min jew min hu hi l- kantanta . Jimpurtaha biss mill- ħoss mużikali , jimpurtaha biss jekk il- kanzunetta hiex kompetittiva , tal- widna u li tappella għall- pubbliku kollu mifrux madwar il- kontinent u mhux f' Malta biss . " Jien sorpriż ħafna bit- talent il- ġdid li ħiereġ u li jidher fil- lista ta' finalisti , " spjega Abela li żied kif minn fost il- ġurija kien hemm min diġa' ħa nota ta' xi ismijiet ta' kantanti u dan għax hemm il- possibbiltà li wara l- festival ċerti kantanti jkunu avviċinati għal kuntratti . " Dan hu li rrid nisma' u nara li qed jiġri fix- xena mużikali Maltija , " saħaq Robert Abela li żied jikkummenta fuq dak li fisser bħala " bir wiesa' ta' talent kbir " . " B' dan it- talent kollu li għandna kapaċi niksbu s- suċċessi , kemm fuq livell ta' kantanti individwali kif ukoll bħala pajjiż u dan ovvjament fuq il- palk internazjonali . " Waqt l- intervista fakkart lil Robert Abela fir- riżultat miksub minn Malta fil- Eurovision li għadda . Hu reġa' tenna kif bħala chairperson , kif ukoll il- kumitat kollu tal- MaltaSong , m' għandhom iġorru l- ebda ħtija għar- riżultat . " Għamilna dak kollu li kien meħtieġ li jsir u ma fallejna l- ebda obbligu tagħna . Il- kanzunetta ta' Fabrizio Faniello ntgħażlet mill- pubbliku Malti u mhux minna l- kumitat , " sostna . Fi kliem iċ- Chairperson tal- MaltaSong , il- kanzunetta " I Do " ta' Fabrizio Faniello għamlet suċċess mal- Maltin . Madankollu ma niżlitx tajjeb ħafna mal- pubbliku Ewropew f' dawk it- tliet minuti ta' wirja fuq il- palk ta' Ateni . Fl- istess ħin kien hemm il- fattur tas- sorpriża tal- Finlandiżi " Lordi " li bil- kanzunetta " Rock Allelulia " u l- istil li ħarġu bih kaxkru l- voti mingħand kulħadd u din kompliet titfagħna lura . Robert Abela jibqa' sod wara Fabrizio Faniello . " Hu kantant tajjeb , umli u kien raġel biżżejjed li jassumi pubblikament ir- responsabbiltà ta' dak li seta' għamel fiċ- ċirkostanżi . " " Fabrizio ma beżax imur quddiem il- kameras tat- TV , jieħu l- kritika kollha li saritlu u jibqa' jitkellem mal- pubbliku Malti minkejja l- umiljazzjoni li ġarrab , " sostna . Filwaqt li żied fuq il- konvinzjoni tiegħu li l- poplu Malti ma ħadhiex lanqas kontra Fabrizio Faniello , Robert Abela sellem l- irġulija tal- kantant li għaraf il- mument li jaffronta lill- pubbliku diżappuntat bir- riżultat . " Fabrizio għandu karattru sod u hu professjonista u nemmen bis- sħiħ li l- esperjenza ta' Ateni saħħitu u mmaturatu . " Imwarrba l- kwistjoni dwar ir- riżultat miksub fl- aħħar edizzjoni ta' l- Eurovision , jien u Robert Abela nibdew nitkellmu fuq l- agħa kbira li tinqala' f' Malta kull darba li jasal iż- żmien kemm għall- festival kif ukoll għall- Eurovision . " Tistenna din l- agħa għax hu l- uniku palk internazzjonali għall- kanzunetta Maltija . It- Taljani għandhom il- vetrina ta' Sanremo , u għalina l- festival tagħna hi l- vetrina tagħna . " " Fil- Eurovision ksibna riżultati eċċellenti u sirna poplu li nagħtu l- appoġġ bis- saħħa lil kulmin irrappreżentah , " sostna . U l- festival li ġej ? " Qed inbiddlu ħafna affarijiet u se nagħmluh isbaħ , " weġibna Robert Abela li għażel li ma jiżvelax dettalji dwar x' inhu ġej fis- serati ta' l- 1 u t- 3 ta' Frar 2007 . " Li nista' ngħidlek hu li se jkun spettaklu sabiħ u ilna naħdmu għalih għal dawn l- aħħar ġimgħat speċifikament biex il- prodott ikun wieħed tajjeb ħafna u li jirrispondi għaż- żminijiet ta' llum . " Allura l- ebda antiċipazzjoni ? " Li nista' ngħidlek hu li għadni kif ġibt il- konferma li l- kantanta Ruslana ta' l- Ukrajna , li rebħet il- Eurovision tas- sena l- oħra , se tkun Malta għall- festival fis- serata finali " . Din se tkun l- ewwel darba li l- festival se jkollu serata għal semifinali li matulha l- ġurija - li għal darb' oħra se tkun kollha barranija - se jkollha 50 fil- mija tal- vot , filwaqt li l- pubbliku se jkollu 50 fil- mija oħra tal- kelma permezz tat- televoting . Minn dik is- serata se jgħaddu sitt finalisti biss . Minn fosthom , fis- serata tat- 3 ta' Frar , ikun il- pubbliku stess li jkollu r- responsabbiltà ta' l- għażla bit- televoting għall- kanzunetta għall- Ewropa . U l- preżentaturi ? " Tkellimna ma' diversi nies u wasalna biex identifikajna l- persuni li se jippreżentaw il- festival li ġej . L- ismijiet huma mistennija li jitħabbru aktarx il- ġimgħa d- dieħla . " Lejn tmiem l- intervista , waqt li Robert Abela kien qed jilgħab bl- ispaga tal- borża tat- tè li niżżel f' kikkra bil- misħun , staqsejtu : Temmen li kapaċi nirbħu l- Eurovision ? " Mela le . Wasalna sat- tieni post ma' Chiara . Ma naslux l- ewwel xi darba tgħid ? Irridu nżommu saqajna ma' l- art , u nibqgħu ngħarfu li l- kanzunetta li se nibagħtu għall- Eurovision tkun tappella għas- suq Ewropew , " jibqa' jinsisti . Allura Robert Abela jixtieq li jkun għadu ċ- Chairperson tal- MaltaSong dakinhar li b' mod ipotetiku Malta tasal biex tirbaħ il- Eurovision ? Iweġibni b' daħka , iżda żamm serju : " Dan hu totalment irrilevanti . L- importanti li t- talent Malti jkun ħa l- premju li jkun jistħoqqlu fuq il- palk internazzjonali . "